ഇടുക്കി ജില്ലയിൽ നവകേരള സദസ്സ് നടക്കുമ്പോൾ മുഖ്യമന്ത്രിയും മന്ത്രിമാരും സഞ്ചരിച്ച ബസ് മുട്ടും തട്ടുമില്ലാതെ കടന്നുപോകുമോ എന്ന് അധികൃത സംശയിച്ച ഒരു പാലമുണ്ട് ശാന്തൻപാറയിൽ. 106 കിലോമീറ്റർ ദൈർഘ്യമുള്ള മൂന്നാർ - കുമളി സംസ്ഥാനപാതയിൽ ശാന്തൻപാറക്ക് സമീപമാണ് 7 പതിറ്റാണ്ട് പഴക്കമുള്ള ഈ പാലം സ്ഥിതി ചെയ്യുന്നത്. അപകടാവസ്ഥയിലായ ഈ പാലം പുനർനിർമിക്കുവാൻ നടപടിയില്ല
നവകേരള സദസിന്റെ അടിമാലിയിലെ പര്യടനത്തിനുശേഷം മുഖ്യമന്ത്രിയും മന്ത്രിമാരും സഞ്ചരിച്ച ബസ് നെടുങ്കണ്ടത്തേക്ക് പോയത് ഈ വഴിയാണ്. അറ്റകുറ്റപണികൾ ഇല്ലാതെ അപകട കെണിയൊരുക്കി നിൽക്കുന്ന ഈ പാലത്തിൽ അധികൃതർ പലതവണ പരിശോധന നടത്തിയിരുന്നു. പൂപ്പാറയ്ക്കും ശാന്തൻ പാറയ്ക്കും ഇടയിലുള്ള ഈ പാലം അപകടാവസ്ഥയിലായിട്ട് വർഷങ്ങളായെങ്കിലും പുതിയ കോൺക്രീറ്റ് പാലം നിർമ്മിക്കാനുള്ള നടപടികൾ ഇഴയുകയാണ്. മൂന്നാറിൽ തുടങ്ങി നെടുങ്കണ്ടം, പുളിയന്മല, വണ്ടൻമേട് എന്നിവിടങ്ങളിലൂടെ കുമളിയിൽ അവസാനിക്കുന്ന എസ് എച്ച് 19 എന്നറിയപ്പെടുന്ന ഈ റോഡ് സംസ്ഥാന രൂപീകരണത്തിന് മുൻപ് ജില്ലയിൽ നിർമ്മിച്ച പ്രധാന പാതയാണ്.
1952 ലാണ് തിരു-കൊച്ചി സർക്കാരിലെ പൊതുമരാമത്ത് മന്ത്രിയായിരുന്ന ജി. ചന്ദ്രശേഖരപിള്ള ഈ റോഡിന്റെ ഉദ്ഘാടനം നിർവഹിച്ചത്. അന്ന് ദേവികുളം - കുമളി റോഡ് എന്നറിയപ്പെടുന്ന ഈ പാതയിലെ ഏറ്റവും പഴക്കമുള്ള പാലമാണ് ശാന്തൻപാറയിലേത്. വർഷങ്ങൾക്കു മുൻപ് പാലത്തിന്റെ കൈവരികൾ ബലപ്പെടുത്തിയത് മാത്രമാണ് ഇവിടെ നടത്തിയ ഏക നവീകരണ പ്രവർത്തനം . നിരവധി വാഹനാപകടങ്ങളാണ് ഈ പാലത്തിൽ ഉണ്ടായത്. ചരക്ക് വാഹനങ്ങൾ പാലത്തിൽ കയറുമ്പോൾ ഭയമാണെന്ന് നാട്ടുകാർ പറയുന്നു. സമീപത്തെ റോഡുകളെല്ലാം നന്നാക്കിയെങ്കിലും അപകടാവസ്ഥയിലായ ഇത്തരം പാലങ്ങൾ കൂടി പുനർ നിർമ്മിക്കണമെന്നാണ് നാട്ടുകാരുടെ ആവശ്യം.
