സംസ്ഥാനത്തെ എസ് എസ് എൽ സി ഫലപ്രഖ്യാപനം നാളെ നടക്കും. ഹയർസെക്കൻ്ററി ഫലങ്ങൾ ഒൻപതിന് പ്രസിദ്ധീകരിക്കും. ഫലപ്രഖ്യാപനത്തിനനുസരിച്ച് പ്ലസ് വൺ പ്രവേശനം വേഗത്തിലാക്കുമെന്നാണ് പൊതുവിദ്യാഭ്യാസ വകുപ്പ് മന്ത്രിയുടെ ഉറപ്പ്.
കഴിഞ്ഞ വര്‍ഷത്തെ അപേക്ഷിച്ച് ഇത്തവണ 11 ദിവസം മുന്‍പേയാണ് എസ്എസ്എൽസി ഫല പ്രഖ്യാപനം നടക്കാൻ പോകുന്നത്. നാളെ ഉച്ചക്ക് 3 മണിക്ക് എസ്എസ്എൽസി ഫലം പ്രസിദ്ധീകരിക്കും. ഇത്തവണ 4, 27,105 വിദ്യാർത്ഥികളാണ് എസ്.എസ്.എൽ.സി പരീക്ഷ എഴുതിയത്. അതിൽ 2,17,525 ആൺകുട്ടികളും 2,09,580 പെൺകുട്ടികളും ഉൾപ്പെടുന്നു.
സംസ്ഥാനത്തൊട്ടാകെ 70 ക്യാമ്പുകളിലായി 10,863 അധ്യാപകരാണ് മൂല്യനിർണ്ണയ ക്യാമ്പിൽ പങ്കെടുത്തത്. ഏപ്രിൽ 3 മുതൽ 20 വരെയായിരുന്നു മൂല്യനിർണ്ണയം. പ്ലസ് വൺ, പ്ലസ് ടു പരീക്ഷാ മൂല്യനിർണ്ണയത്തിൽ 77 ക്യാമ്പുകളിലായി ഇരുപത്തി അയ്യായിരത്തോളം അധ്യാപകരാണ് പങ്കെടുത്തത്.
9 നാണ് ഹയർസെക്കൻ്ററി ഫലം പ്രസിദ്ധീകരിക്കുക. ഫലപ്രഖ്യാപനത്തിന് അനുസരിച്ച് പ്ലസ് വൺ പ്രവേശനം വേഗത്തിലാക്കുമെന്നും പൊതുവിദ്യാഭ്യാസ വകുപ്പ് മന്ത്രി വി. ശിവൻകുട്ടി അറിയിച്ചു.
