കൊച്ചി: കേരളവിഷന്റെ സംരംഭക കൺവെൻഷന് കൊച്ചി വേദിയായി. ലോകത്തിനും രാജ്യത്തിനും മുന്‍പില്‍ കേരളവിഷന് മനോഹരമായ ബദല്‍ തീര്‍ത്തെന്ന് സംസ്ഥാന കൃഷി വകുപ്പ് മന്ത്രി പി പ്രസാദ് കൺവെൻഷൻ ഉദ്ഘാടനം നിര്‍വ്വഹിച്ച് പറഞ്ഞു. കേരളവിഷന്റെ ഈ വളർച്ചയിൽ ഏറെ സന്തോഷമുണ്ടെന്നും, ആഗോളവത്ക്കരണത്തിന്റെ കാലത്ത് വൻകിട കുത്തകകളോട് മത്സരിക്കാൻ സാധിക്കുകയില്ല, ബദലുകൾ സൃഷ്ടിക്കാനാവില്ല എന്ന മുദ്രാവാക്യത്തിന് പകരമായി ലോകത്തിന് മുൻപിൽ മനോഹരമായൊരു ബദൽ കാണിക്കുവാൻ കേരളവിഷന് സാധിച്ചുവെന്ന് മന്ത്രി പറഞ്ഞു. വാര്‍ത്തയും വസ്തുതയും തമ്മിലുള്ള അന്തരത്തില്‍ നിന്ന് വസ്തുത മുന്നോട്ടു വയ്ക്കുമ്പോള്‍ വിശ്വാസ്യത ഉണ്ടാകുന്നു. ആ വിശ്വാസ്യത മുന്നോട്ടു വെക്കാന്‍ കേരളവിഷന് കഴിഞ്ഞെന്നും മന്ത്രി പറഞ്ഞു. ഇത് ഇനിയും പ്രോത്സാഹിപ്പിക്കേണ്ടതാണ്. കുത്തക കമ്പനികളെപ്പോലെ വൻ ബാങ്കുകളുടെ സാമ്പത്തിക സഹായത്തോടെ അല്ല, ഇവിടെ മുതൽ മുടക്കുന്നത് ഒരു ജനതയാണ് എന്നതിനാൽ മറ്റ് അജണ്ടകളോ താത്പര്യങ്ങളോ ഉണ്ടാകുകയില്ല എന്നും സാധാരണക്കാരുടെ പണമാണ് കേരളവിഷന്റെ പിന്‍ബലമെന്നും അദ്ദേഹം കൂട്ടിച്ചേർത്തു.
കേരളവിഷനുമായി സഹകരിച്ചുള്ള എന്ത് പദ്ധതികൾ തയ്യാറാക്കുന്നതിനും കൃഷിവകുപ്പ് തയ്യാറാണെന്നും കേരളവിഷന്റെ ഈ തീരുമാനം ഏറെ സന്തോഷത്തോടെ സ്വീകരിക്കുന്നുവെന്നും മന്ത്രി പറഞ്ഞു.
കേരളവിഷൻ ഒടിടി പ്ലാറ്റ്ഫോം ലോഞ്ചിങ് ഹൈബി ഈഡൻ എംപി നിർവഹിച്ചു.കേരളവിഷന്റെ വളർച്ചയ്ക്ക് പിന്നിൽ ആത്മാർത്ഥതയും പുതിയതിനെ ഉൾക്കൊള്ളാനുള്ള മനസ്സുമാണെന്ന് ഹൈബി ഈഡൻ എംപി പറഞ്ഞു.
ഉദ്‌ഘാടന ചടങ്ങ് ഇവിടെ ക്ലിക്ക് ചെയ്ത് കാണാം
കേരളവിഷന്റെ നേട്ടം സമാനതകളില്ലാത്തതാണെന്നും ഇത് സാധ്യമാക്കിയതിൽ കേരളവിഷന്റെ സാരഥികളെയും സംരഭകരെയും അഭിനന്ദനങ്ങൾ അറിയിക്കുന്നുവെന്നും ലൂക്കർ ഇന്ത്യ എംഡി ജ്യോതിഷ് കുമാർ പറഞ്ഞു
കേബിള്‍ ടിവി ഓപ്പറേറ്റേഴ്സ് അസോസിയേഷൻ സംസ്ഥാന പ്രസിഡന്റായിരുന്ന എന്‍.എച്ച് അന്‍വറിന്റെ സ്മരണാര്‍ത്ഥം എന്‍.എച്ച് അന്‍വര്‍ ട്രസ്റ്റ് നല്‍കുന്ന അഞ്ചാമത് ടെലിവിഷന്‍ മാധ്യമ അവാര്‍ഡുകള്‍ വിതരണം ചെയ്തു .മാധ്യമ രംഗത്തെ സമഗ്ര സംഭാവനയ്ക്കുള്ള പുരസ്‌കാരം പ്രമുഖ മാധ്യമ പ്രവര്‍ത്തകന്‍ സി.എല്‍. തോമസിനു സമ്മാനിച്ചു. സാറ്റ്‌ലൈറ്റ് ന്യൂസ് ചാനൽ വിഭാഗത്തിൽ മികച്ച മാധ്യമ പ്രവർത്തകയ്ക്കുള്ള പുരസ്‌കാരം അഖില നന്ദകുമാർ ഏറ്റുവാങ്ങി.വര്‍ധിച്ചുവരുന്ന മയക്കുമരുന്നുപയോഗം യുവജനങ്ങളിലും സമൂഹത്തിലും സൃഷ്ടിക്കുന്ന പ്രത്യാഘാതങ്ങളെക്കുറിച്ച് ജനങ്ങളിൽ അവബോധം സൃഷ്ടിക്കുന്ന സമഗ്രമായ റിപ്പോര്‍ട്ടുകളാണ് അഖില നന്ദകുമാറിനെ പുരസ്‌കാരത്തിന് അര്‍ഹയാക്കിയത്.
കേബിള്‍ ടിവി ചാനലുകളിലെ മികച്ച മാധ്യമ പ്രവര്‍ത്തകനുള്ള പുരസ്‌കാരം കണ്ണൂര്‍ വിഷന്‍ ബ്യൂറോ ചീഫ് മനോജ് മയ്യിൽ ഏറ്റുവാങ്ങി . ടിസിവി ന്യൂസ് തൃശ്ശൂര്‍ ബ്യൂറോ ചീഫ് മുകേഷ് ലാല്‍ പുരസ്‌കാര ജൂറിയുടെ പ്രത്യേക പരാമര്‍ശത്തിനുള്ള പുരസ്‌കാരം ഏറ്റുവാങ്ങി.
കേബിള്‍ ടിവി ചാനലുകളിലെ മികച്ച വാര്‍ത്താധിഷ്ഠിത പരിപാടിക്കുള്ള പുരസ്‌കാരം വയനാട് വിഷന്‍ ചാനലിലെ വി. കെ രഘുനാഥ് അവതരിപ്പിക്കുന്ന ട്രൂ സെന്‍സിനു ലഭിച്ചു.കേബിള്‍ ടിവി ചാനലുകളിലെ മികച്ച പ്രോഗ്രാം പ്രൊഡ്യൂസറിനുള്ള പുരസ്‌കാരം വയനാട് വിഷന്‍ ചാനലിലെ ശ്രുതി കെ ഷാജി ഏറ്റുവാങ്ങി.വേരുകള്‍ എന്ന പരിപാടിയാണ് ശ്രുതിയെ പുരസ്‌കാരത്തിന് അര്‍ഹയാക്കിയത്. കേബിള്‍ ടിവി ചാനലുകളിലെ മികച്ച വിഷ്വല്‍ എഡിറ്ററിനുള്ള പുരസ്‌കാരം വയനാട് വിഷന്‍ ചാനലിലെ സഞ്ജയ് ശങ്കരനാരായണനും മികച്ച ക്യാമറാ പേഴ്‌സണനുള്ള പുരസ്‌കാരം അനീഷ് നിളയും ഏറ്റുവാങ്ങി.
മുതിര്‍ന്ന മാധ്യമ പ്രവര്‍ത്തകന്‍ ഡോ. സെബാസ്റ്റ്യൻ പോളാണ് അവാർഡ് വിതരണം നടത്തിയത്.
എന്‍എച്ച് അന്‍വര്‍ ട്രസ്റ്റ് മാധ്യമ അവാര്‍ഡ് വിതരണം ഇവിടെ ക്ലിക്ക് ചെയ്ത് കാണാം
പ്രൗഢ ഗംഭീരമായ ചടങ്ങിൽ കലാ വിരുന്നോടെയായിരുന്നു പ്രഥമ കേരളവിഷൻ ടെലിവിഷൻ അവാർഡുകളുടെ വിതരണം നടന്നത്. കേരളം കാത്തിരുന്ന പുരസ്‌കാര ചടങ്ങിൽ പ്രേക്ഷകരുടെ ഇഷ്ടപ്പെട്ട ടെലിവിഷൻ താരങ്ങൾക്ക് അവാർഡുകൾ സമ്മാനിച്ചു.
പ്രഥമ കേരളവിഷൻ ടെലിവിഷൻ അവാർഡ് വിതരണം ഇവിടെ ക്ലിക്ക് ചെയ്ത് കാണാം
കൊച്ചി ബോള്‍ഗാട്ടി ഗ്രാന്റ് ഹയാത്തില്‍ നടന്ന കേരളവിഷന് സംരംഭക കണ്‍വെന്‍ഷനില്‍ പങ്കാളികളായത് ആയിരത്തി അഞ്ഞൂറിലേറെ സംരംഭകരാണ്.
