ആദായ നികുതി റിട്ടേൺ (ITR) സമർപ്പിക്കുന്നവർക്ക് മിക്കവർക്കും നികുതി ലാഭിക്കുന്നതിനുള്ള പരമ്പരാഗത നിക്ഷേപ മാർഗങ്ങളെ കുറിച്ച്  പരിചയമുണ്ടാകും. എന്നാൽ പെട്ടെന്ന് ശ്രദ്ധയിൽപ്പെടാത്തതും പക്ഷേ ജീവിതത്തിൽ നേരിടുന്നതുമായ 10 ചെലവുകളിൽ നിന്നും നികുതി ഇളവ് നേടാനുള്ള അർഹത ഒളിഞ്ഞിരിപ്പുണ്ട്. അവയുടെ വിശദാംശങ്ങളാണ് ചുവടെ ചേർക്കുന്നത്.

പ്രിവന്റീവ് ഹെൽത്ത് ചെക്ക്-അപ്പ്: ആരോഗ്യ സംരക്ഷണാർത്ഥം നടത്തുന്ന രോഗനിവാരണ പരിശോധനകൾക്ക് (സ്വയം, ആശ്രിതരായ മക്കൾ, പങ്കാളി, 60 വയസിൽ താഴെയുള്ള മാതാപിതാക്കൾ) നൽകുന്ന ചെലവിൽ 5,000 രൂപയുടെ നികുതി കിഴിവിന് അർഹതയുണ്ട്. ആദായ നികുതി നിയമത്തിലെ വകുപ്പ് 80-ഡി പ്രകാരമാണ് ഇളവിനുള്ള അർഹത.

കുട്ടികളുടെ ട്യൂഷൻ ഫീസ്: കുട്ടികളുടെ വിദ്യാഭ്യാസത്തിനായി നൽകുന്ന ഫീസുകളും ചാർജുകൾക്കും നികുതി കിഴിവ് ലഭിക്കും. വകുപ്പ് 80-സി പ്രകാരം നിശ്ചിത ചെലവ് പരിധിയിലായിരിക്കും ആനുകൂല്യത്തിനുള്ള അർഹത.

ആശ്രിതർക്കായുള്ള ചെലവ്: തന്റെ വരുമാനത്തെ ആശ്രയിച്ച് കഴിയുന്ന കുട്ടികൾ, മതാപിതാക്കൾ, മറ്റ് ആശ്രിതർക്കും വേണ്ടി ചെലവിടുന്ന തുകയിൽ നികുതി ഇളവ് തേടാനാകും. വകുപ്പ് 80-സി മുതൽ 80-യു വരെ ഇതിലേക്ക് പ്രയോജനപ്പെടുത്താനാകും.

വീട്ടുവാടക അലവൻസ്(HRA): നിങ്ങൾ വാടക വീട്ടിലാണ് താമസിക്കുന്നത് എങ്കിൽ , നികുതി ഭാരം കുറയ്ക്കുന്നതിനുള്ള ഇളവിന് അർഹതയുണ്ട്. ആദായ നികുതി നിയമത്തിലെ ചട്ടം 10 (13എ) പ്രകാരമാണിത്. നിങ്ങൾക്ക് ലഭിക്കുന്ന യഥാർത്ഥ എച്ച്ആർഎയിൽ നിന്നും നികുതി ഇളവ് ചോദിക്കാനാകും. അല്ലെങ്കിൽ യഥാർത്ഥ ശമ്പളത്തിന്റെ 10 ശതമാനത്തിൽ താഴെയോ, മെട്രോ നഗങ്ങളിൽ അടിസ്ഥാന ശമ്പളത്തിന്റെ 50% വരെ (40% മെട്രോ ഇതര നഗരങ്ങൾക്ക്) വാടകയ്ക്ക് നൽകുന്ന തുകയോ ഏതാണോ കുറവ്, അതിൽ നിന്നും നികുതി ഇളവ് തേടാം.

വിദ്യാഭ്യാസ ലോണിന്റെ പലിശ: വകുപ്പ് 80-ഇ പ്രകാരം, വിദ്യാഭ്യാസത്തിനായി എടുത്ത വായ്പയുടെ പലിശയ്ക്ക് ചെലവിടുന്ന തുക നികുതി ഇളവിനായി ചോദിക്കാനാകും. നികുതി കിഴിവിനുള്ള പരിധിക്ക് നിശ്ചിത തുക ഏർപ്പെടുത്തിയിട്ടില്ല. 8 വർഷം വരെയോ അല്ലെങ്കിൽ പലിശ അടച്ച് തീർക്കുന്നത് വരെയോ ഏതാണോ ആദ്യം വരുന്നതിന്റെ അടിസ്ഥാനത്തിൽ നികുതി ഇളവ് തേടാം.

എൻപിഎസ്: ദേശീയ പെൻഷൻ സ്കീമിലേക്ക് നൽകുന്ന വിഹിതത്തിന് 50,000 രൂപ വരെയുള്ള അധിക ഇളവ് വകുപ്പ് 80-സിസിഡി (1ബി) ഉപയോഗപ്പെടുത്തി നേടാനാകും. വകുപ്പ് 80-സി പ്രകാരം വാർഷികമായി 1.5 ലക്ഷത്തിന്റെ നികുതി കിഴിവിന് പുറമെയാണിത്.

ലൈഫ് ഇൻഷുറൻസിൽ നിന്നുള്ള വരുമാനം: ലൈഫ് ഇൻഷുറൻസ് പോളിസിയിൽ നിന്നും ലഭിക്കുന്ന ഏത് തുകയും (ബോൺസ് ഉൾപ്പെടെ) വകുപ്പ് 10 (10ഡി) പ്രകാരം നികുതി ഇളവിനുള്ള അർഹതയുണ്ട്.

പോസ്റ്റ് ഓഫീസ് സേവിങ്സിൽ നിന്നുള്ള പലിശ വരുമാനം: ഒരു സാമ്പത്തിക വർഷത്തിൽ വ്യക്തിഗത അക്കൗണ്ടിൽ നിന്നും പരമാവധി 3,500 രൂപയും ജോയിന്റ് അക്കൗണ്ടിൽ 7,000 രൂപ വരെയും വകുപ്പ് 10(15) പ്രകാരം നികുതി കിഴിവ് തേടാം.

എൻപിഎസിലേക്കുള്ള തൊഴിലുടമയുടെ വിഹിതം: ദേശീയ പെൻഷൻ സ്കീമിലേക്ക് തൊഴിലുടമയുടെ വിഹിതം/ സൂപ്പർഅന്യൂവേഷൻ/ ഇപിഎഫ് എന്നിവയിലേക്കുള്ള 7.5 ലക്ഷത്തിൽ അധികമുള്ള വിഹിതം പുതിയ നികുതി സമ്പ്രദായത്തിൽ നികുതി ബാധ്യതയുണ്ട്. എന്നിരുന്നാലും ഈ തുകയിൽ നിന്നും ആർജിക്കുന്ന പലിശയോ തൊഴിലുടമയുടെ വിഹിതത്തിന്മേലുള്ള വർധനയോ നികുതിയിൽ നിന്നും ഒഴിവാക്കിയിട്ടുണ്ട്.