ഇന്നത്തെ ലോകത്ത് സോഷ്യൽ മീഡിയ ഇല്ലാത്ത ഒരു ജീവിതം സങ്കൽപ്പിക്കാൻ പോലും പറ്റില്ല. വിനോദത്തിനും വിശേഷങ്ങൾ അറിയാനും മാത്രമല്ല, പല ആളുകളും സാമ്പത്തിക കാര്യങ്ങൾ പഠിക്കാനും സോഷ്യൽ മീഡിയയെ ആശ്രയിക്കുന്നു. ഓഹരി വിപണിയിലെ ‘ടിപ്‌സ്’, ക്രിപ്റ്റോ കറൻസിയിലെ നിക്ഷേപം, എളുപ്പത്തിൽ പണമുണ്ടാക്കാനുള്ള കുറുക്കുവഴികൾ... ഇങ്ങനെ പലതും നമ്മൾ ദിവസവും സോഷ്യൽ മീഡിയയിൽ കാണുന്നു.
എന്നാൽ, സോഷ്യൽ മീഡിയയിൽ കാണുന്ന ഈ സാമ്പത്തിക ഉപദേശങ്ങൾ അത്ര വിശ്വസിക്കാൻ കൊള്ളാമോ? നമ്മൾ എത്രത്തോളം ശ്രദ്ധിക്കണം? സോഷ്യൽ മീഡിയ ഒരു സാമ്പത്തിക ഉപദേഷ്ടാവാകാൻ പറ്റാത്ത ചില കാരണങ്ങൾ ഇതാ:
1. ആർക്കും എന്തും പറയാം, തട്ടിപ്പുകൾക്ക് സാധ്യത:
സോഷ്യൽ മീഡിയയിൽ ആർക്കും എന്തും വിളിച്ചു പറയാം, എഴുതിവിടാം. ഇവിടെ സാമ്പത്തിക കാര്യങ്ങളിൽ ഉപദേശം നൽകാൻ പ്രത്യേക ലൈസൻസോ, നിയമപരമായ അംഗീകാരമോ ഒന്നും വേണ്ട. അതുകൊണ്ട് തന്നെ, പലപ്പോഴും കിട്ടുന്ന വിവരങ്ങൾ തെറ്റായിരിക്കാം, അല്ലെങ്കിൽ നമ്മളെ പറ്റിക്കാൻ വേണ്ടി ഇറക്കിയ തട്ടിപ്പുകളായിരിക്കാം. ‘ഈ ആപ്പ് ഇൻസ്റ്റാൾ ചെയ്താൽ ഉടൻ ലക്ഷങ്ങൾ നേടാം’, ‘ഈ ഓഹരി വാങ്ങിയാൽ നിങ്ങൾ കോടീശ്വരനാകും’ എന്നൊക്കെയുള്ള പരസ്യങ്ങളെ വിശ്വസിച്ച് പലരും ചതിക്കുഴിയിൽ വീഴുന്നത് പതിവാണ്.
2. എല്ലാവർക്കും ഒരേ ഉപദേശം, വ്യക്തിഗത ശ്രദ്ധയില്ല:
ഓരോരുത്തരുടെയും സാമ്പത്തിക ലക്ഷ്യങ്ങൾ, വരുമാനം, കടങ്ങൾ, റിസ്ക് എടുക്കാനുള്ള കഴിവ് എന്നിവയെല്ലാം വ്യത്യസ്തമായിരിക്കും. സോഷ്യൽ മീഡിയയിൽ കിട്ടുന്ന ഉപദേശങ്ങൾ പൊതുവെയുള്ള അറിവുകൾ മാത്രമാണ്. അത് നിങ്ങളുടെ സ്വന്തം സാഹചര്യത്തിന് ചേർന്നതാണോ എന്ന് ആരും നോക്കാറില്ല. നിങ്ങളുടെ സാമ്പത്തിക സ്ഥിതിയെക്കുറിച്ച് ഒരറിവുമില്ലാതെ ആരെങ്കിലും ഒരു ഉപദേശം തന്നാൽ, അത് ചിലപ്പോൾ ഗുണത്തേക്കാളേറെ ദോഷം ചെയ്യാനാണ് സാധ്യത.
3. ലളിതവൽക്കരണം, പൊങ്ങച്ചം:
സോഷ്യൽ മീഡിയയിൽ പെട്ടെന്ന് ശ്രദ്ധ കിട്ടാൻ വേണ്ടി പലപ്പോഴും സാമ്പത്തിക കാര്യങ്ങളെ വളച്ചൊടിച്ച് ലളിതമാക്കും. ചിലപ്പോൾ സത്യമല്ലാത്ത കാര്യങ്ങൾ അതിശയോക്തി കലർത്തി അവതരിപ്പിക്കും. "ഈ ഓഹരി വാങ്ങിയാൽ റോക്കറ്റ് പോലെ കുതിച്ചുയരും", "ഈ മ്യൂച്വൽ ഫണ്ടിൽ ഇട്ടാൽ പൈസ ഇരട്ടിയാകും" എന്നൊക്കെയുള്ള വാഗ്ദാനങ്ങൾ കേൾക്കാൻ നല്ല രസമുണ്ടാകും, പക്ഷേ പലപ്പോഴും ഇതിന് യാഥാർത്ഥ്യവുമായി ഒരു ബന്ധവുമുണ്ടാവില്ല.
4. സ്വന്തം കീശ വീർപ്പിക്കാൻ:
സോഷ്യൽ മീഡിയയിലെ ‘ഇൻഫ്ലുവൻസർമാർ’ പലപ്പോഴും അവരുടെ സ്വന്തം കാര്യലാഭത്തിനാണ് മുൻഗണന കൊടുക്കുന്നത്. ഒരു പ്രത്യേക ഓഹരിയെക്കുറിച്ചോ, അല്ലെങ്കിൽ ഒരു നിക്ഷേപ പദ്ധതിയെക്കുറിച്ചോ അവർ നല്ലത് പറഞ്ഞ് വീഡിയോ ഇട്ടാൽ, അതിന് പിന്നിൽ ആ പ്രോഡക്റ്റ് വിൽക്കുന്ന കമ്പനിയുടെ കമ്മീഷനോ മറ്റു നേട്ടങ്ങളോ ഉണ്ടാകാം. ഇവരുടെ വാക്കുകൾ കേട്ട് നമ്മൾ ചാടിയിറങ്ങി നിക്ഷേപം ചെയ്യുമ്പോൾ ഒന്ന് സൂക്ഷിക്കുന്നത് നല്ലതാണ്.
5. പേടിപ്പിച്ച് പണം തട്ടൽ, FOMO:
സോഷ്യൽ മീഡിയയിലെ ട്രെൻഡുകൾ മിന്നൽ പോലെ മാറും. ഒരു ഓഹരിയോ ക്രിപ്റ്റോ കറൻസിയോ പെട്ടെന്ന് വൈറലാകുമ്പോൾ, പലർക്കും ‘ഇത് മിസ്സായാൽ എന്റെ കഷ്ടകാലം’ (Fear Of Missing Out - FOMO) എന്നൊരു തോന്നൽ വരും. ഇതുകാരണo പലരും ഒന്നും ആലോചിക്കാതെ എടുത്തുചാടി നിക്ഷേപം നടത്തും. ഇങ്ങനെയുള്ള ധൃതിപിടിച്ച തീരുമാനങ്ങൾ പലപ്പോഴും ചെന്ന് നിൽക്കുന്നത് വലിയ നഷ്ട്ടത്തിലായിരിക്കും.
ശരിയായ സാമ്പത്തിക ഉപദേശം എവിടെ നിന്ന് കിട്ടും?
സോഷ്യൽ മീഡിയയെ അന്ധമായി വിശ്വസിക്കരുത് എന്ന് നമ്മൾ കണ്ടു. എന്നാൽ പിന്നെ എങ്ങനെയാണ് ശരിയായ സാമ്പത്തിക ഉപദേശം നേടുക?
സെബി (SEBI) രജിസ്റ്റർ ചെയ്ത ഉപദേഷ്ടാക്കൾ: ഇന്ത്യയിൽ സെബിയിൽ രജിസ്റ്റർ ചെയ്ത സാമ്പത്തിക ഉപദേഷ്ടാക്കളുണ്ട്. അവർക്ക് ലൈസൻസുണ്ട്, നിയമപരമായി ഉത്തരവാദിത്തമുണ്ട്, അവരെ വിശ്വസിക്കാം.
ബാങ്കുകൾ, അംഗീകൃത ധനകാര്യ സ്ഥാപനങ്ങൾ: ബാങ്കുകളും മറ്റു അംഗീകൃത ഫിനാൻഷ്യൽ സ്ഥാപനങ്ങളും സാമ്പത്തിക ഉപദേശങ്ങൾ നൽകുന്നു. അവരെയും വിശ്വസിക്കാം.
വിദഗ്ധരുമായി ആലോചിക്കുക: നിങ്ങളുടെ സാമ്പത്തിക കാര്യങ്ങളെക്കുറിച്ച് നല്ല അറിവുള്ള, വിശ്വസ്തരായ ആളുകളുമായി സംസാരിക്കുക. അവരിൽ നിന്നും ഉപദേശം തേടാം.
അവസാനമായി ഒരു കാര്യം കൂടി ഓർമ്മിപ്പിക്കുന്നു, സോഷ്യൽ മീഡിയയിലെ സാമ്പത്തിക ഉപദേശങ്ങൾ അത്ര വിശ്വസനീയമല്ല. അവിടെ തട്ടിപ്പുകൾക്കും, തെറ്റായ വിവരങ്ങൾക്കും സാധ്യതകളുണ്ട്. നിങ്ങളുടെ സാമ്പത്തിക ഭാവിയ്ക്ക് നല്ല തീരുമാനമെടുക്കാൻ, വിദഗ്ധരെ സമീപിക്കുക, അല്ലാതെ സോഷ്യൽ മീഡിയയിലെ വാക്കുകൾ കേട്ട് എടുത്തുചാടി നിങ്ങളുടെ കഷ്ടപ്പാടിന്റെ പണം വെറുതെ കളയരുത്. സോഷ്യൽ മീഡിയയിലെ സാമ്പത്തിക ഉപദേശങ്ങളെക്കുറിച്ച് നിങ്ങൾക്ക് ഒരു ധാരണ കിട്ടി എന്ന് വിശ്വസിക്കുന്നു.
