സ്റ്റേഷൻ ഹൗസ് ഓഫീസർ ചുമതല ഇൻസ്പെക്ടര്‍മാരിൽ നിന്നും എസ്.ഐമാർക്ക് തിരിച്ചു നൽകാൻ സാധ്യത. ഒന്നാം പിണറായി സർക്കാരാണ് സ്റ്റേഷൻ ഭരണം ഇൻസ്പെക്ടർമാർക്ക് നൽകിക്കൊണ്ടുള്ള പരിഷ്ക്കാരം നടത്തിയത്. തുടർന്ന് ഈ പരിഷ്ക്കാരം പാളിയെന്ന റിപ്പോർട്ടിന്റെ അടിസ്ഥാനത്തിലാണ് ഇപ്പോഴത്തെ പുനഃരാലോചന.
2018 നവംബർ മാസം അന്നത്തെ പൊലിസ് മേധവി ലോക്നാഥ് ബെഹ്റയുടെ റിപ്പോർട്ടിന്റെ അടിസ്ഥാനത്തിലായിരുന്നു ഒന്നാം പിണറായി സർക്കാർ പൊലിസിൽ പരിഷ്ക്കരണം നടത്തിയത്. തുടർന്ന് സംസ്ഥാനത്ത 472 പൊലിസ് സ്റ്റേഷനുകളുടെ ഭരണം എസ്.ഐമാരിൽ നിന്നും ഇൻസ്പെക്ടർമാർക്ക് കൈമാറി. കൂടാതെ എസ്.ഐമാരുടെ തസ്തിക ഇൻസ്പെക്ടർ റാങ്കിലേക്ക് ഉയർത്തുകയും 218 പേർക്ക് കൂട്ടത്തോടെ സ്ഥാനകയറ്റം നൽകുകയും ചെയ്തു. സ്റ്റേഷൻ പ്രവർത്തനം കുറേക്കൂടി കാര്യക്ഷമമായി കൊണ്ടുപോകാൻ ഇൻസ്പെക്ടർമാർക്ക് കഴിയുമെന്നായിരുന്നു അന്നത്തെ വിലയിരുത്തൽ. ഇതോടെ രണ്ട് സ്റ്റേഷന്റെ ചുമതല നോക്കിയിരുന്ന സര്‍ക്കിള്‍ ഇൻസ്‍പെക്ടർമാർ ഒരു സ്റ്റേഷന്റെ ചുമതലയിലേക്ക് ഒതുങ്ങി. എസ്.പിമ്മാരും എ.ഡി.ജി.പിമ്മാരും ചേർന്ന യോഗത്തിൽ ഈ പരിഷ്ക്കരണം വേണ്ടത്ര പ്രയോജനം ഉണ്ടാക്കിയില്ലെന്ന വിമർശനവുമുണ്ടായി. ഇക്കാര്യം പരിശോധിക്കാന്‍ വേണ്ടി ഡി.ജി.പി ടി.കെ വിനോദ് കുമാറിന്റെ നേതൃത്വത്തിൽ നാലംഗ സമിതിയുണ്ടാക്കുകയും നാലുവർഷം പിന്നിടുമ്പോൾ പരിഷ്ക്കരണം നേട്ടത്തെക്കാള്‍ കൂടുതൽ കോട്ടമാണ് ഉണ്ടാക്കിയതെന്ന് സമിതി റിപ്പോർട്ട് നൽകുകയും ചെയ്തു. തുടർന്നാണ് പരിഷ്ക്കരണത്തിൽ വീണ്ടും മാറ്റം കൊണ്ടുവരാൻ ഉദ്ദേശിക്കുന്നത്.
