കണ്ണൂര്‍ സര്‍വകലാശാല വിദ്യാര്‍ഥി യൂണിയന്‍ തെരഞ്ഞെടുപ്പില്‍ എസ്.എഫ്.ഐക്ക് ഉജ്ജ്വല വിജയം. മുഴുവന്‍ സീറ്റുകളിലും എസ്.എഫ്.ഐ. സ്ഥാനാര്‍ഥികളാണ് വിജയിച്ചത്. തുടര്‍ച്ചയായ 25-ാം തവണയാണ് എസ്.എഫ്.ഐ. കണ്ണൂര്‍ സര്‍വകലാശാല യൂണിയന്‍ നേടുന്നത്.
നാമനിർദേശപത്രിക സമർപ്പണം പൂർത്തിയായപ്പോൾ വയനാട് ജില്ലാ എക്‌സിക്യൂട്ടീവ്‌ സ്ഥാനത്തേക്ക്‌ എസ്എഫ്ഐ എതിരില്ലാതെ വിജയിച്ചിരുന്നു. മാനന്തവാടി പി കെ കാളൻ മെമ്മോറിയൽ കോളേജ് ഓഫ്‌ അപ്ലൈഡ്‌ സയൻസിലെ അതുൽകൃഷ്‌ണയാണ്‌ തെരഞ്ഞെടുക്കപ്പെട്ടത്‌.
നേരത്തെ, കള്ളവോട്ടിനെച്ചൊല്ലി എസ്.എഫ്.ഐ- കെ.എസ്.യു. പ്രവര്‍ത്തകര്‍ ഏറ്റുമുട്ടിയിരുന്നു. കാസര്‍കോട്ടുനിന്നുള്ള വോട്ടറുടെ തിരിച്ചറിയല്‍ കാര്‍ഡ് എസ്.എഫ്.ഐ. പ്രവര്‍ത്തകര്‍ തട്ടിപ്പറിച്ച് ഓടി എന്ന് കെ.എസ്.യു- എം.എസ്.എഫ്. സഖ്യം ആരോപിച്ചു. എന്നാല്‍, കള്ളവോട്ടിനുള്ള ശ്രമം പ്രതിരോധിക്കുകയായിരുന്നുവെന്നാണ് എസ്.എഫ്.ഐ. വിശദീകരിച്ചത്. സംഘര്‍ഷമുണ്ടായതിനെത്തുടര്‍ന്ന് പോലീസ് ലാത്തി വീശി.
എം.എസ്.എഫ്. പാനലില്‍ വിജയിച്ച യു.യു.സിയുടെ തിരിച്ചറിയല്‍ രേഖ വ്യാജമല്ലെന്ന് പിന്നീട് തെളിഞ്ഞു. വിദ്യാര്‍ഥിനിയുടെ വീട്ടിലേക്ക് ഫോണ്‍ചെയ്തും വീഡിയോ കോള്‍ചെയ്തുമാണ് ഇക്കാര്യം തെളിയിച്ചത്.
