ഗുരുവായൂരിലെ ലോഡ്ജില്‍ പെണ്‍കുട്ടികളെ മരിച്ച നിലയില്‍ കണ്ടെത്തിയ സംഭവം കൊലപാതകം. സംഭവത്തില്‍ കുട്ടികളുടെ പിതാവ് വയനാട് സ്വദേശി മുഴങ്ങില്‍ ചന്ദ്രശേഖരനെതിരെ പൊലീസ് കൊലക്കുറ്റത്തിന് കേസെടുത്തു. കുട്ടികളെ കൊലപ്പെടുത്തിയ ശേഷം ഇയാള്‍ കൈയിലെ ഞരമ്പ് മുറിച്ച് ആത്മഹത്യക്ക് ശ്രമിക്കുകയായിരുന്നു. 8 വയസ്സുള്ള ദേവനന്ദ, 12 വയസ്സുള്ള ശിവനന്ദന എന്നിവരാണ് കഴിഞ്ഞ ദിവസം കൊല്ലപ്പെട്ടത്. കൊലപാതക വിവരങ്ങള്‍ ഡയറിയില്‍ കുറിച്ച ശേഷമാണ് ചന്ദ്രശേഖരന്‍ ആത്മഹത്യക്ക് ശ്രമിച്ചത്. ഈ ഡയറി പോലീസ് കണ്ടെടുത്തു. സ്ഥലത്ത് പരിശോധന നടത്തിയ ഫോറന്‍സിക് വിദഗ്ദരും പൊലീസ് സര്‍ജനും കുട്ടികളുടെ മരണം ആത്മഹത്യയല്ലെന്ന് വിലയിരുത്തിയിരുന്നു. ചികില്‍സയിലുള്ള ചന്ദ്രശേഖരന്‍ അപകടനില തരണം ചെയ്താലുടന്‍ ഇയാളുടെ അറസ്റ്റ് പോലീസ് രേഖപ്പെടുത്തും.
