കേരളത്തിന്റെ മുഖ്യ വിവരാവകാശ കമ്മീഷണറായി വി. ഹരി നായർ സത്യപ്രതിജ്ഞ ചെയ്തു. രാജ് ഭവനിൽ വെച്ച് നടന്ന ചടങ്ങിൽ ഗവർണർ ആരിഫ് മുഹമ്മദ്‌ ഖാൻ, മുഖ്യമന്ത്രി പിണറായി വിജയൻ തുടങ്ങിയവർ പങ്കെടുത്തു. തുടർന്ന് ഗവർണർ സത്യവാചകം ചൊല്ലിക്കൊടുത്തു.
2021 ൽ വി. ഹരിനായർ നിയമ സെക്രട്ടറിയായിരുന്നു. നിയമ നിർമ്മാണത്തിന് മാത്രമായി നിയമസഭ ഒരു സെഷൻ വിളിച്ചുച്ചേർത്ത് 36 ബില്ലുകൾ പാസാക്കിയത് അദ്ദേഹം നിയമ സെക്രട്ടറിയായ ഉടനെയാണ്. കൂടാതെ നിയമവകുപ്പിൽ ഇ ഓഫീസ് പൂർണമായി നടപ്പിലാക്കുകയും നോട്ടറി നിയമനങ്ങൾ ഓൺലൈനാക്കാൻ നേതൃത്വം നൽകുകയും ചെയ്തിട്ടുണ്ട്.
