സംസ്ഥാനത്ത് വീണ്ടും പകർച്ചവ്യാധി ആശങ്ക. എലിപ്പനിയും ഡെങ്കിപ്പനിയും ബാധിക്കുന്നവരുടെ എണ്ണം ഉയരുന്നു. 116 പേർ എട്ട് മാസത്തിനിടെ എലിപ്പനി ബാധിച്ച് മരിച്ചു. ജാഗ്രത പാലിക്കാൻ ആരോഗ്യവകുപ്പ്...
പകർച്ചവ്യാധി വ്യാപനത്തിൽ ആരോഗ്യവകുപ്പ് പുറത്തുവിട്ട കണക്കുകൾ ആശങ്കപ്പെടുത്തുകയാണ്. ഈ മാസം ഇതുവരെ എലിപ്പനി സ്ഥിരീകരിച്ചത് 317 പേർക്കാണ്, ഇതിൽ 20 പേർ മരിച്ചു. 21 പേരുടെ മരണം എലിപ്പനിയാണെന്ന് സംശയിക്കുന്നുമുണ്ട്.
ഈ മാസം വൈറൽ പനിക്ക് ചികിത്സ തേടിയവരുടെ എണ്ണം രണ്ട് ലക്ഷത്തിന് മുകളിലാണ്.എലിപ്പനി ബാധിക്കുന്നവരുടെ എണ്ണം മുൻവർഷങ്ങളെ അപേക്ഷിച്ച് കൂടുതലാണെന്നും കണക്കുകൾ വ്യക്തമാക്കുന്നു.
ഈ വർഷം 1,897 പേർക്കാണ് രോഗം സ്ഥിരീകരിച്ചത്, 116 പേർ രോഗം ബാധിച്ച് മരിച്ചു. 1937 പേർക്ക് ഈ മാസം ഡെങ്കി സ്ഥിരീകരിച്ചതായുള്ള കണക്കും ആരോഗ്യവകുപ്പ് പുറത്ത് വിട്ടിട്ടുണ്ട്. എലിപ്പനി പ്രതിരോധ ഗുളികയായ ഡോക്സിസൈക്ലിൻ കഴിക്കണമെന്ന് ആരോഗ്യവകുപ്പ് പറയുന്നു.
പ്രതിരോധ നിർദ്ദേശങ്ങൾ നൽകിയിട്ടും ഡെങ്കി വ്യാപനത്തിലും കുറവുണ്ടാകുന്നില്ല. 434 പേർക്ക് ഈ മാസം എച്ച് വൺ എൻ വണ്ണും ബാധിച്ചു, 9 മരണങ്ങളാണ് എച്ച് വൺ എൻ വൺ ബാധിച്ചുണ്ടായത്. ഇതിനൊപ്പം പകർച്ചപ്പനി ബാധിതരുടെ എണ്ണവും കൂടുന്നു.
മഞ്ഞപ്പിത്തം സ്ഥിരീകരിച്ച 509 പേരിൽ 7 പേർ ഈ മാസം മരിക്കുകയും ചെയ്തു. പ്രതിരോധ പ്രവർത്തനങ്ങൾ ഊർജ്ജിതമായി നടത്താനും ജാഗ്രത പാലിക്കാനും ആരോഗ്യവകുപ്പ് നിർദ്ദേശം നൽകിയിട്ടുണ്ട്.
