ഡല്‍ഹി മുഖ്യമന്ത്രി അരവിന്ദ് കെജ്രിവാളിന് വീണ്ടും സമന്‍സയച്ച് ഇഡി.നാലാം തവണയാണ് കെജ്രിവാളിന് ഇഡി സമന്‍സയക്കുന്നത്.ജനുവരി 18 ന് ചോദ്യം ചെയ്യലിന് ഹാജരാകണമെന്നാവശ്യപ്പെട്ടാണ് സമന്‍സ്.
നേരത്തെ മൂന്ന് തവണ സമന്‍സ് നല്‍കിയപ്പോഴും കെജ്രിവാള്‍ ചോദ്യം ചെയ്യലിന് ഹാജരായിരുന്നില്ല.ജനുവരി 3 നാണ് അവസാന സമന്‍സ് അയച്ചത്. ആ സമന്‍സ് നിയമപരമല്ലെന്നും , രാഷ്ട്രീയ പ്രേരിതമാണെന്നും പറഞ്ഞായിരുന്നു ചോദ്യം ചെയ്യലിന് ഹാജരാകാതിരുന്നത് .
അതിനു മുമ്പ് ഡിസംബര്‍ 21 നും നവംബര്‍ 2 നും ഇഡി സമന്‍സ് അയച്ചിരുന്നു.തനിക്ക് ഒന്നും മറച്ചു വയ്ക്കാനില്ലെന്നും , നിയമപരമായ ഏതു സമന്‍സും സ്വീകരിക്കാന്‍ താന്‍ തയ്യാറാണെന്നുമാണ് അദ്ദേഹം പ്രതികരിച്ചത്.വരാനിരിക്കുന്ന ലോക്‌സഭാ തെരഞ്ഞെടുപ്പിന്റെ പ്രചരണത്തില്‍ താന്‍ പങ്കെടുക്കുന്നത് തടയാനാണ് ഈ നീക്കമെന്നും അദ്ദേഹം പറഞ്ഞു.അഴിമതി ആരോപണങ്ങളെ തുടര്‍ന്ന് കഴിഞ്ഞ ജൂലൈയില്‍ ഡല്‍ഹി സര്‍ക്കാര്‍ പിന്‍വലിച്ച മദ്യനയവുമായി ബന്ധപ്പെട്ട കള്ളപ്പണം വെളുപ്പിക്കലിനെക്കുറിച്ച് നടന്നുകൊണ്ടിരിക്കുന്ന അന്വേഷണത്തിന്റെ ഭാഗമായാണ് ഇ.ഡി നീക്കം.
